Árið 2010 auðveldara?

Hvernig á árið 2010 að verða auðveldara fyrir Íslendinga? Vonandi verður fjármálakerfið ekki jafn lamað að ári og vonandi geta íslensk fyrirtæki, þau sem lifa af, stundað viðskipti við útlönd með eðlilegum hætti. Vonandi verða vextir lægri, svo ný fyrirtæki geti komið í stað þeirra sem leggja upp laupana á næstu mánuðum.

En það verður tæplega auðveldara að reka ríkissjóð á árinu 2010. Áætlaður halli á ríkisfjárlögum fyrir árið 2009 er 153 milljarðar króna. Tekjur eru áætlaðar 402 milljarðar en gjöld 555 milljarðar. Fyrir hverjar 100 krónur sem koma inn í ríkissjóð fara út 138 krónur. 

Á árinu 2010 á þessi halli að vera "umtalsvert minni" og á árinu 2011 eiga fjárlög að vera hallalaus*, samkvæmt skilyrðum Alþjóða Gjaldeyrissjóðsins.

Nú finndist mér að ríkisstjórn ætti að upplýsa okkur hversu mikill  hallinn megi vera á fjárlögum 2010?  75 milljarðar? 50 milljarðar? Sér ríkisstjórnin fyrir sér að skatttekjur muni aukast sem þessu nemur milli áranna 2009 og 2010? Um 14-20% ?  Eða mun þurfa að skera niður ríkisútgjöld um tugi milljarða?

Við skulum ekki vera með neinn bölmóð, en við verðum að horfast í augu við sannleikann.

 

*Þetta stendur raunar ekki svona skýrt í skilyrðum AGS, eins og þeim er lýst í viljayfirlýsingu Ríkisstjórnarinnar (18 liða yfirlýsingin).  Þar stendur þar:

14.      Við ætlum okkur að hrinda í framkvæmd metnaðarfullri áætlun um ríkisfjármálin. Fyrsta skref þessarar áætlunar kemur til framkvæmda með fjárlögum ársins 2010. Við áformum aðgerðir til að minnka halla á hagsveifluleiðréttum frumjöfnuði ríkissjóðs um 2–3% á ári yfir áætlunartímabilið með það að markmiði að hagsveifluleiðréttur frumjöfnuður verði orðinn jákvæður árið 2011 og jákvæður um 3,5–4% miðað við landsframleiðslu árið 2012.

Geti einhver skýrt hugtakið "hagsveifluleiðréttur frumjöfnuður" er það vel þegið!

 

Hér er svo áætlun ríkisins um tekjur og gjöld Ríkissjóðs 2009:

Fjárlagafrumvarp 2009, 3. umræða

Lagagreinar

A-hluti
Rekstraryfirlit ríkissjóðs

1. gr.

Árið 2009 er áætlað að tekjur og gjöld ríkissjóðs verði eins og tilgreint er í þessari grein, sbr. sundurliðun 1 og 2.

m.kr.	Rekstrar- grunnur	Sjóðs- hreyfingar
Skatttekjur	364.332,2	359.787,8
Skattar á tekjur einstaklinga	103.313,0	104.165,0
Skattar á tekjur lögaðila	22.100,0	21.000,0
Tryggingagjöld	39.818,5	39.267,2
Eignarskattar	7.062,8	6.946,8
Virðisaukaskattur	128.196,0	124.988,0
Aðrir skattar á vörur og þjónustu	52.750,9	52.744,8
Skattar ótaldir annars staðar	11.091,0	10.676,0
Aðrar rekstrartekjur	30.413,1	29.584,0
Arðgreiðslur	2.130,0	2.130,0
Vaxtatekjur og eignatekjur	22.287,7	21.457,7
Rekstrartekjur ótaldar annars staðar	5.995,4	5.996,3
Sala eigna	6.300,0	7.800,0
Fjárframlög	1.453,4	1.452,4
Tekjur alls	402.498,7	398.624,2
Æðsta stjórn ríkisins	3.783,2	3.783,2
Forsætisráðuneyti	2.221,1	2.221,1
Menntamálaráðuneyti	58.801,0	58.801,0
Utanríkisráðuneyti	12.256,9	12.256,9
Sjávarútvegs- og landbúnaðarráðuneyti	17.546,8	17.619,8
Dóms- og kirkjumálaráðuneyti	23.456,4	23.456,4
Félags- og tryggingamálaráðuneyti	113.140,5	112.454,5
Heilbrigðisráðuneyti	115.659,7	115.659,7
Fjármálaráðuneyti	55.234,9	47.271,9
Samgönguráðuneyti	50.972,8	50.897,8
Iðnaðarráðuneyti	6.280,5	6.280,5
Viðskiptaráðuneyti	2.715,3	2.715,3
Umhverfisráðuneyti	6.631,8	6.631,8
Vaxtagjöld ríkissjóðs	86.940,0	76.570,0
Samtals	555.640,9	536.619,9
Tekju-jöfnuður	-153.142,2

 

Geir: Árið verður mjög erfitt

Athugasemdir

[Einar Karl, 17.1.2009 kl. 19:15]

Sigrún: það er ekki skrýtið, ég skil þetta heldur ekki allt saman! En setjum upp einfalt dæmi, segjum svo að á árinu 2009 sértu með 100.000 krónur í útborguð laun á mánuði, en mánaðarleg útgjöld eru 138.000 kr. (Þetta er staða ríkissjóðs). Mamma og pabbi lána þér fyrir hallanum (þú þarft raunar að borga þeim tilbaka á nokkrum árum!), en þau setja sem skilyrði að á árinu 2011 verður bókhaldið hjá þér að vera hallalaust. Þá þurfa tekjurnar hjá þér að aukast um 38%, eða þú þarft að skera niður útgjöldin sem því nemur!