Furðufjölmiðillinn Viðskiptablaðið

Viðskiptablaðið er lesið fyrst og fremst af fólki í viðskiptalífinu,  forsvarsmönnum og stjórnendum fyrirtækja, bankafólki og fræðingum ýmiskonar sem hafa gagn og áhuga á viðskiptafréttum og hagtölum. Fólki sem í könnunum undanfarin ár hefur með miklum meirihluta stutt aðild að ESB, ef frá eru taldir forsvarsmenn sjávarútvegsfyrirtækja.

Því mætti ætla að lesendur blaðsins hafi glaðst yfir ákvörðun Alþingis um að sækja um aðild að ESB, og að blaðið myndi hella sér af fullum krafti í umræðu og analýsu á möguleg áhrif aðildar á viðskiptalífið - meginviðfangsefni blaðsins.

En blaðið hefur greinilega líka áhuga á pólitík og birtir í liðinni viku forsíðumynd þar sem þingmenn VG eru sýndir í skrúfstykki, íklæddir fangabúningum með hlekki um háls og fætur.

Er þetta það sem ritstjórarnir halda að lesendur blaðsins í viðskiptalífinu hafi mestan áhuga á í vikunni eftir að Ísland sótti um ESB aðild?

Ekki getur það verið að nein flokkspólitísk slagsíða sé á ritstjórn Viðskiptablaðsins??

Hvað ætli ritstjórninni finnist um afstöðu nánast allra þingmanna Sjálfstæðisflokksins í málinu? Svona faglega séð, með hagsmuni og áhugasvið viðskiptalífsins að leiðarljósi?

Væri ekki forvitnilegt að sjá Viðskiptablaðið rýna í hvernig standi á því að sá flokkur, sem er í miklum og góðum tengslum við viðskiptalíf og atvinnurekstur, skuli taka afstöðu í þessu máli sem virðist ganga í berhögg við flesta hagsmunaaðila í viðskiptalífinu, sem ætla mætti að kjósi þann flokk umfram aðra?

 

Athugasemdir

[AK-72, 26.7.2009 kl. 20:08]

Skýringin er mjög einföld, ef þú skoðar fólkið á bak við blaðið. Þar má sjá nöfn á borð við Andrés Magnússon og Gísla Frey Valdórrson, sem hvorugur myndu nokkurn tímann flokkast undir hlutlausa menn, heldur frekar gargandi kallara nýfrjálshyggju Davíðs Oddsonar, og eiga erfitt með að halda sinni heimssýn og ofsatrú á þeirri stefnu aðskildu frá blaðamennsku.

[Einar Karl, 26.7.2009 kl. 23:19]

Jú þeir eru víst þarna allnokkrir dyggir stuðningsmenn. Og kannski jafn ráðvilltir og aðrir flokkshollir í innri glímu Sjálfstæðisflokksins í ESB-málinu. Þá er auðveldara að beina sjónum að sálarangist vinstri-grænna.