Hvað er arður?

Undarlegt fyrirtæki, skil ekki enn hvernig eigendur gátu fyrir tæpum 11 mánuðum greitt sér 13 milljarða í arð fyrir árið 2007, rúmlega tvöfaldan hagnað félagsins það árið, sem var þó eflaust að miklu leyti tilkominn vegna ofmats á hlutabréfaeign, en hlutabréfaverð fór jafnt og þétt hríðlækkandi einmitt á þeim tíma sem risa-arðgreiðslan átti sér stað.

Hinn galvaski bloggari Gunnar Axel Axelsson hefur töluvert skrifað um BYR, meðal annars reynt að skilja hvernig í ósköpunum menn gengu ófeimnir og fyrir opnum tjöldum í sjóði félagsins og jafnvel tóku lán í nafni félagsins til að stinga í eigin vasa sem arðgreiðslur!  Ég leyfi mér að vitna beint í orð Gunnars Axel frá 27. febrúar:

Ég hef skoðað opinbera ársreikninga eins af stóru eigendunum í BYR. Þar kemur fram hvernig þurrka átti upp varasjóðinn á aðeins tveimur árum. Lán var fengið frá Glitni í desember  2007 og af því var greiddur um þriðjungur strax um vorið 2008 þegar risaargreiðslan var borguð út. Samkvæmt ársreikningnum átti síðan að greiða megnið af láninu upp ári síðar, eða í næstu arðgreiðsluatrennu. 

Ef planið hefði gengið upp þá væru valdhafar í BYR nú að undirbúa næstu arðgreiðslu, sem eins og sú fyrri kæmi öll úr varasjóðnum (sem er lögum samkvæmt í almannaeign).  Það er hætt við að þá hefði varasjóðurinn verið tæmdur endanlega.

Er þetta löglegt? Boðlegt? Siðlegt? Hefur FME lagt blessun sína yfir þetta?

Tap Byrs 28,9 milljarðar króna

Ræðukeppni í Kastljósi, forðast að minnast á staðreyndir

Ósköp fannst mér dapurlegt að fylgjast með þingmönnunum tveimur í Kastljósinu ræða hugmyndir Indriða H. Þorlákssonar um skattahækkanir. Það vakti sérstakan kjánahroll að hlusta á barnalegan málflutning Sigurðar Kára Kristjánssonar sem talaði eins og í Morfís keppni - ertu með eða á móti sköttum?

Hann sagði að það kæmi "engan veginn til greina" að hækka skatta og að hugmyndir Indriða væru "í besta falli fjarstæðukenndar". En bíðum nú við, var ekki síðasta ríkisstjórn að gera einmitt þetta, þó í minna mæli, að hækka skatta á umtalsverðan hluta fólks - þeirra sem hærri tekjur hafa - nú um síðustu áramót?! En þá var Sigurður Kári náttúrulega ekki í stjórnarandstöðu og gat ekki blaðrað út loftið.

Hvernig vill þingmaðurinn ná niður halla á ríkisrekstri? Jú, með því að "skera verulega niður", "lækka laun að minnsta kost sumra hópa í ríkiskerfinu", "leggja niður og fækka stofnunum". Sjálfstæðismenn hafa setið í ríkisstjórn í 17 ár. Hafa þeir á þeim tíma verið að reka fjöldann allan af óþörfum stofnunum? Þingmaðurinn viðurkenndi að það þyrfti að láta enda ná saman. Ef hann skyldi ekki muna það, því ekki var minnst á það í þættinum, þá er fyrirséður halli ríkisins á þessu ári 153 milljarðar. Ég birti rekstraryfirlit fjárlaganna í færslu fyrir tveimur vikum. Sigurður Kári og aðrir þeir sem telja alls ekki koma til greina að hækka skatta geta dundað sér við að finna út hvar megi skera niður útgjöld ríkisins um 153 milljarða. (Þeir sem t.d. vilja leggja niður sendiráð geta séð að heildarútgjöld Utanríkisráðuneytis eru um 12 milljarðar, eða  tæp 8% af hallanum.)

Ég ætla ekkert að hæla frammistöðu Árna Páls Árnasonar, sem ræddi um að "færa til byrðar", en kom sér fimlega undan því að ræða það sem Indriði var að segja, að hér væri ekki hægt að komast undan því að hækka skatta, útaf því hvernig komið er fyrir íslenska ríkinu, þökk sé meðal annars þeim sem því hafa stýrt.