Dómharka

Ég er svolítið forviða að sjá hversu margir telja sjálfsagða og eðlilega sjö ára fangelsidóma yfir 19 ára konum sem gerðu tilraun til að smygla dópi. 

Þær hefðu átt að hugsa um þetta áður en brutu af sér - eða eitthvað á þessa leið segja margir.

Jú fólk verður að taka afleiðingum gjörða sinna. En refsing fyrir lögbrot hlýtur að eiga að vera í einhverju samræmi við alvarleika brotsins.  

Á hverjum er dópsmyglari að brjóta??  Dópneytendum?  Vilja dópistar að burðardýr séu dæmd í margra ára fangelsisvist? Er það ekki staðreynd að margir dópsmyglarar eru sjálfir dópistar? (Sbr. ógæfusama manninn sem fyrir skemmstu lést á Litla Hrauni vegna of stórs skammts af dópi.)

Ég er ekki bara að tala um stelpurnar tvær í fangelsi í Prag. Hér á landi eru dópsmyglarar dæmdir mjög þungum dómum, margra ára fangelsi fyrir hörð efni og mikið magn. 

Af hverju á "burðardýr" sem smyglar dópi (en neyðir engan til að taka það) að fá margfalt harðari dóm en einhver sem er sekur um alvarlega líkamsárás? Jafnvel þótt þú limlestir einhvern hrottalega fengirðu vægari dóm en fyrir að smygla nokkrum kílóum af dópi. Sanngjarnt og réttlátt? 

Hér er raunverulegt dæmi um dóm fyrir líkamsárás:

"Sakfellt fyrir þrjár líkamsárásir, þar af eina sérstaklega hættulega. Refsing ákveðin fangelsi í 8 mánuði, þar af eru 6 mánuðir skilorðsbundnir til 3 ára. Þá var ákærði dæmdur til að greiða tveimur brotaþolum skaðabætur."

 

Athugasemdir

[Maron Bergmann (IP-tala skráð) 14.11.2013 kl. 22:40]

Það er einfaldlega verið að búa til gat í kerfinu ef "burðardýr" fá afslátt af refsingu.  Þá er einfalt mál að fara á eigin vegum og ná í slatta af efnum.  Ef viðkomandi er hirtur þá einfaldlega kemur hann með burðardýrs trompið og sleppur með léttari refsingu en ella.  Meðan "burðardýrin" benda ekki á þann sem fékk þau til verksins, skipulagði flutninginn eða næsta einstakling sem er fyrir ofan í keðjunni þá eru viðkomandi einstaklingar búnir að fyrirgera rétti sýnum til vægari refsingar.

[Einar Karl, 16.11.2013 kl. 09:21]

Ég er ekki að tala um "afslátt" hedur að refsingar verði vægari, ekki bara fyrir þá sem kallast "burðardýr", heldur fyrir fíkniefnasmygl og fíkniefnabrot almennt.